Waor of neet waor aflevering 530

donderdag 05 juni 2003

Wim Kuipers

Hae haet zie zäödje

[A. FOUT]

Allewiel geit alle aandach bie 't groter waere nao de meide oet. Wiene die groot waere, van die vleugelkes neudig höbbe. Jónges kieke neet mie oet nao häöre sjnor. Vreuger waal. Me maakde menkes wies det ze veur groot te waere sjnorrezäödje kóste koupe. En wen nónk Huppelepup dan bie zoe menke get häörkes zoog, dan reep hae: Hoera, oos jungske haet zie zäödje: de sjnor kump op.

[B. GOED]

Waat is zaod? Grei veur te zejje, det me eine goje rieke ougs krieg. Wie mier wie baeter. Det zól me ouch van sjpekelere op de beurs kónne zèkge, en in 't casino: get geldj zejje mit de bedoeling väöl trök te kriege. Noe wore vreuger wie oos taal óntsjtange is gein casino's in de buurt.Wiene zagte oos grootvaders dan: hae haet zie zäödje? Loester: wen eine mit kaarte kiet gesjpeeld hauw: nieks gewónne, mae ouch nieks verklaore: 't zäödje, d'n inzat wo hae mit begós woor, bleef euver.

[C. FOUT]

Loester, ich zèk det drei maol: dae haet zie zäödje, zie zäödje, ziezäödje. Ja? Kint geer det Mesjtreechs leedje, van Zjuulke van Zuzaote? Zuzaote: det is gein plaats die besjteit, det is neet serieus en Zjuulke woor eine gewiepde, dus: dae haet zie zäödje beteikentj: dem greujt get in de kop, dae is neet gans normaal.

[OPLOSSING: B]