Waor of neet waor aflevering 531

vrijdag 06 juni 2003

Wim Kuipers

Besjpinne

[A. FOUT]

D-Day vandaag. Zal örges die film The Longest Day waal weer te zeen zien. 't Sjoenste dao-oet vinj ich nag ummer in 't begin, dae Pruus in dae bunker dae door ziene kieker de zie aafsjpiens, aafsjpiens zag ik, en inins al die lanjingssjeep zuut. Waat woor dae man aan 't doon? Dae woor de zie aan 't besjpinne: intensief loere, dao zit sjpienze in, en wo dach geer dat spionere vandan keem?

[B. GOED]

Sjei oet. Eine maondj trök bie de dojeherdinking is gezag: sjei noe ins oet mit daen aorlog, de jeug wit neet waat det gewaes is. Besjpinne is gans get angers, me mót 't bao letterlik numme: waat ein sjpin duit. De beteikenis is dus: neudig höbbe, innumme. Die nuuj bank besjpint wied te väöl ruumte in det kaemerke.

[C. FOUT]

Besjpinne det haet natuurlik mit sjpanning te make, krek wie de deur die sjpint. En dus is besjpinne, meis gebroek es: zich besjpinne, dus zich drök make, zenuwechtig zien, zörg höbbe, det saort dinger.

 

[OPLOSSING: B]

Besjpinne in deze betekenis komt voor in het noorden van de provincie Vlaams Limburg en het Land van Weert. Het Nederlands kent deze betekenis niet.