Waor of neet waor aflevering 532

dinsdag 10 juni 2003

Wim Kuipers

Winke mit de sjuurpórt

[A. GOED]

Superfantastische oetdrökking. Die kump oet d'n tied det d'r Indiane woende in de Piel. Indiane kóste neet sjrieve. Ze sjproke mit de vingere: gebaretaal neump me det. En wen ze wiejer weg wore, gsm's wore d'r neet, dan gove ze rouksienjale. Mae det woor in de Piel döks te gevierlik, wen 't maonje dreug woor. Waat gebeurde? D'n houfman, einen indiaan van veer maeter, dae mós zien luuj waarsjouwe veur Braobantjse indiane, van de kantje van Deurne. Die hauwe zich versjtaoke in de Piel. Hae wós wo, en det mós hae die angere wieze. Wat deej hae? Hae winkde mit de sjuurpórt wo de viejandj zoot, en seer daen tied is det ein oetdrökking róndj de Piel. Winke mit de sjuurpórt: get hiel hiel dudelik make, of dudelik laote blieke.

[B. FOUT]

De sjuurpórt: dao kan me neet umhaer in dees oetdrökking. Meug det ouch de pórt van ei kesjtiel zien? In later jaore loog die aan 't inj van ein opriejlaan. En wen de graof dan bezeuk kreeg, dan leet hae ein oer teveure al de pórt wiegewaad aopezitte, veur te laote zeen: ich mein 't gans good, geer zeet welkóm. Dao kump die oetdrökking vandan, en de beteikenis is gewaore: emes euverdadig óntvange, euverlaje mit aete, drank en bedening.

[C. FOUT]

Och och. Waal ins van eine winkelhaok geheurd? Dae is veur eine rechten hook te make. Eine raam en ein deur, die mótte häöks zien, angers gao ze neet good toew. Wie duit me det, det winke van eine raam? Mit de winkelhaok. Mae bie ein zjwaor sjuurpórt is det get lestiger. Bienao ummer sjoerde zoe'n pórt euver de kejje. Dus waat zag me wen emes eine raam of deur of keske sjeif gemaak hauw, wen die dinger neet häöks wore? Waats doe duis, det is winke mit de sjuurpórt: neet good häöks maete.

[OPLOSSING: A]