Waor of neet waor aflevering 539

donderdag 19 juni 2003

Wim Kuipers

Gooddoons

[A. FOUT]

Ha – gooddoons, det waord is op 1 jannewarie 1960 oetgesjtórve. Me wit neer of det in de nuujaorsnach gebeurd is of later op d'n daag. Kwatsj meint geer? Bietje. Ich wil allein dudelik make det gooddoons d'n IKKE IKKE-tied neet euverlaef haet. Gooddoons, det woor oos waord veur 't rare naastenliefde, soms weldaad.

[B. FOUT]

Gans eige Limburgs waord, zoeväöl is zeker. De luuj hie wore vreuger in weerwil van alle elenj neet negatief. Ze zoge in väöl gedoons get goods, en det neumde ze gooddoons. In de jaore dartig waerde det nag gebroek. Ich zal ei veurbeeldj gaeve. Wen d'r ein golje broelof woor in 't dörp, of eine jóng deej zien ierste mès, dan maakde 't dörp grote arke: det zien triómfbäög van jeneverbes en dennegreun, en dan woor jónk en aod daomit doonde, alles wirvelde doorein, en dan zag eine aoje mins: waat ei gooddoons dao. Gooddoons: get waat good gebeurt, gemeenschapszin.

[C. GOED]

Nae nae – geer dink aan ‘good gedoons'. Det is verkierd. Gooddoons – tösse häökskes: wit geer nag ei waord van neuge lètters mit veer o's? - gooddoons haet dus waal mit good doon te sjafte, mae 't is get waat dich zelf good duit, dus genoegen, voldoening.

[OPLOSSING: C]