Waor of neet waor aflevering 540

vrijdag 20 juni 2003

Paul Prikken

mit sjtreu sjleipe

[A = FOUT]

Luuj die mit sjtreu sjleipe det zeen luuj die mit sjpek sjete. Luuj die euverdrieve, die de zakes sjoonder veurstèlle es ze zeen. Es te bieveurbeeld einen okkazie auto geis koupe dan kumps te gegarandeerd eine verkouper taenge dae mit sjtreu aan het sjleipe is, eine dae alles vergreutert en opbleus. Det is mit sjtreu sjleipe: euverdrieve, opkloppe, aandikke.

[B = FOUT]

't Sezoen is noe veurbie mer es te in de lente nao de veugelkes kiks dan wèts te waat dees oetdrökking beteikent. De menkesveugel zeen dan mit sjtreu aan 't sjleipe óm ei nès te boewe. Daomit wille ze aan de wiefkes zèkge: "Kóm bie mich. Kiek ins waat ei sjoon nès ich kèn make mit mien sjtreu!". Me zaet het dus ouch van eine manskael dae ein vrouw gevónje haet womit hae wilt trouwe. Hae is mit sjtreu aan 't sjleipe, zaet me dan. Het doert neet lang meer of hae geit toes weg óm mit zien vrouw same te gaon wone.

[C = GOED]

Mansluuj sleipe neet mit sjtreu. Det is exclusief veur vrouluuj. Kiek mer ins in de sjtad nao die winkels wo ze alderleij sjpöl veur baby's en poete verkoupe. Dao zuus te de vrouluuj die in pesisie zeen mit hunnen dikke boek mit sjtreu sjleipe. Ze koupe ei bèdje, eine kènjerwagel, flesje en tutte. Ze zeen zich de gansen oetzèt veur het kindje biejein aan 't sjleipe. Det beteikent: mit sjtreu sjleipe. Vrouwe die in verwachting zeen die alles klaor aan 't make zeen veur de gebaorte van het kindj.

[OPLOSSING = C]

Mit sjtreu sjleipe of ze is mit sjtreu aan het sjleipe. Beeldspraak afkomstig uit het boerenbedrijf. Als een zeug zwanger is en op de laatste dagen loopt begint ze met stro te slepen om haar kraanbed klaar te maken.