Waor of neet waor aflevering 542

dinsdag 24 juni 2003

Paul Prikken

zichte

[A = FOUT]

Agrarische sector, mien spisjaliteit! Kiek, es te krote, reube of aerpel zeijs is het waal zoe henjig es die allemaol op rieje naevenein sjtaon. Det is gemaekeliker óm de gróndj op te heuge en het is ouch gemaekeliker bie den ouchs. Veurdets te geis zeije, begins te dan iers het sjtök landj te zichte. Sjpans ein touw van den eine kantj nao den angere en det is de lien woelangs te dien krote, reube of aerpel geis paote. Zichte beteikent dus hetzelfde es oetrichte, alles op ein rie zètte.

[B = FOUT]

Agrarische sector, jao, mer toch gans get angers. Het waord kump oet den tied det de pechter de pach van ei sjtök landj nog in verhauting tot de opbremgs moos betale. Es het kaore dan op het puntj sjtóng óm gemeijd te waere dan kaom de rentmeister van de kestielheer het sjtök landj zichte. Hae keek ins good wie het erbie sjtóng en dan zichde hae de opbrings en het perfiet van de kesteelheer. Zichte is dus: sjatte wieväöl den ougs van ei sjtök landj geit opbringe.

[C = GOED]

Es ich den oetlèk van deskundige A en B zouw maoge samevatte, zouw ich zèkge: boeregelul oet den agrarische sector! Det kriegs te mit intellektuele die nog noots ein zeisem of zich in de henj gehad höbbe. Want zichte is meije, maaien mit ein zeisem mit eine korte sjteel. Wurt noe nog gedaon óm het ierste sjtök kaoreveldj vrie te make, zoedet me d'r mit het meijmesjein of de pikdaerser op kèn.

[OPLOSSING = C]

zichte = maaien / bestaat ook in het Nederlands als 'zichten' maar wordt vrijwel niet meer gebruikt. Ein 'zich' is een zeis met een korte steel, maar géén sikkel.