Waor of neet waor aflevering 544

donderdag 26 juni 2003

Paul Prikken

haoleuver zeen

[A = FOUT]

Ich doon het neet meer mer vreuger waor ich nao ei nechske sjtappe dèks haoleuver. Kèns det geveul: ein dreug kael, einen houtere kop. Haoleuver zeen is dus hetzelfde es eine kater höbbe. De Ingelse zèkge d'r 'hangover' taenge. In het Limburgs is det den 'haoleuver'. En waat hulp daotaenge? Alka Selzer, asprinne, of geweun 's meurges weer mit kaud beer beginne.

[B = GOED]

Den haoleuver haet niks mit den 'hangover' te make. In Berg-aan-de-Maas höbs te nog einen haoleuver, het veerpóntj. En es te haoleuver bès, dan beteikent het dets te veilig aan den anegre kantj van de Maas bès. Dich kèn niks meer gebäöre, höbs dien sjeupkes op het dreug, höbs dien finansjeel zakes in orde, kóns gaon rentenere. Wie al die Mestreechtenaere die in Laoneke woene.

[C = FOUT]

Ja, in de gooj richting geredeneerd mer krek het taengeneuvergesjtèlde. Es te haoleuver bès, woens te waarsjienlik neet in Laoneke mer zits te in Mestreech bie de bijstand. Haoleuver zeen beteikent: failliet zeen, al dien geldj kwiet zeen, aan leger wal zeen.

[OPLOSSING = B]

haoleuver zeen: er bovenop zijn, zijn schaapjes op het droge hebben