Waor of neet waor aflevering 545

vrijdag 27 juni 2003

Wim Kuipers

Dae haet eine lap op de bóks

[A. FOUT]

Ha, ein oetdrökking wovan me wit wo die vandan kump: oet ei book van Marie Koenen, Wassend Graan. Dao is ein boerekèrmis aan de gang, en dan woor gebroek det nao de middig, nao 't aete, de boere mit häör gaste 't landj gónge bekieke, wie alles greujde en gediede: Wassend Graan. En dae boer oet det book dae wees maar en wees ónger t wanjele: dao dae lap aerpel is van mich, waat zèk geer van die lep kaore dao, kiek ins wie weus. En doe zag later ein van de luuj die mit wore geloupe: dae haet minstes ein van die lep op de bóks, dus: det is eine opsjöpper, eine sjtoefer.

[B. FOUT]

't Kump waal van de boere, det klop: de keuning hauw geine lap op de bóks, en de dokter onneet. Waat zaet det, eine lap op de bóks? Twie dinger, en ich gaef ze allebei, kump drek gei gesjtechel. A. doe höbs gei geldj veur dich ein nuuj bóks te koupe, of B.: die bóks is hiel aod, wies op de vaam versjlete. En noe de oetdrökking: det waerde gezag van eine ermere jóng dae baove ziene sjtandj wól gaon vrieje, dan heurde me: waat meint dae zich waal, dae haet eine lap op de bóks. Aaf en toe sjloog det ouch op eine aoje vriejer, dae nag greun blaedjes wól.

[C. GOED]

Klink aardig waats doe zaes, al beteikentj 't gans get angers. 't Geit euver dinger wo me neet aopelik euver kalde, zoewie in det book van Antoon Coolen wo die oetdrökking te vinje is. Neet Marie Koenen. Coolen woor oet Wylre (Wielder), Marie Koenen oet Den Bosch, zeuk gerös op. Dae man wo Coolen 't euver haet, in Kinderen van ons volk, dae hauw es jóng get väöl sjpek en aerpel gegaete. Hae woor sjrikkelik sjterk, en op eine zónjig op ein kèrmis kreeg hae ruzing. Hae haolde oet, paaf ein paer en daen angere bleef boes likge. De volgende daag sjtórf d'r. Veldjwachter d'rbie, nou ja, eine nao de kirkhaof, d'n angere de petoet in. En wie dae trök keem in 't dörp, waerde gezag: dae haet eine lap op de bóks: haet in de gevangenis gezaete.

[OPLOSSING: C]

De oetdrökking is gans logisch: dae is ins gevalle, böks gesjeurd, eine lap d'rop. Een schandvlek.