Waor of neet waor aflevering 557

dinsdag 15 juli 2003

Paul Prikken

op de blink sjtaon

[A = FOUT]

Op de blink sjtaon det zaet me in Kirchrao van maedjes die get al te heppetig zeen óm eine jóng aan de haok te sjlaon. Die gaon dan aan de paort van de sjool of van de febrik op de blink sjtaon. Ze etalere het bèste waat ze höbbe, knippere mit hun uigskes. Het is waal dudelik: ze sjtaon op de blink, ze mote eine vriejer höbbe.

[B = FOUT]

Jank jauw jekke jóng! Det doon de maedjes van Kirchrao neet. En het is neet allein veur vrouluuj: ederein kèn op de blik sjtaon. Ich zal det verklaore: door de waek sjtónge de boere op hun klómpe. En 's zóndigs sjtónge ze op de blink. Ja dan trokke ze hun blinkende sjoon aan. Dan waore ze op hun 's zóndigs gekleid, dan waore ze op hun paasbest. Dan sjtónge ze op de blink.

[C = GOED]

Ich kèn eine dae lèts op de blink sjtóng: de waerman van L1. Dae hauw ei jans jroos jewitter baove Kirchrao veursjpeld. En waat gebäörde? Gans niks. Het bleef knaokedreug. En doe sjtóng de waerman veur drie daag bie zien naobers op de blink. Euveral wo hae ziene kop leet zeen, vraogde ze häöm: wo blief det ónwaer van dich? Vervaelend es te op de blink sjteis, dan sjteis te te kiek, dan sjteis te veur paol.

[OPLOSSING = C]

op de blink sjtaon: te kijk staan/ Kerkrade