Waor of neet waor aflevering 561

maandag 21 juli 2003

Paul Prikken

op de klater gaon

[A = FOUT]

De klater: etymologisch heurs te het al. Waat klatert? Geldj. Geldj in de beurs. Mer in dit geval klatert het geldj in de beurs van emes angers. Eine dae op de klater geit det is 'ne sjalevaeger, eine klaploper, eine pintevaeger. Op de klater gaon beteikent dus: klaplopen, taere op het geldj van emes angers, dien rundjes neet ebtale in de kefee.

[B = GOED]

Het kèn ederein waal ins euverkómme. Löps eine winkel oet en dan geit aan de deur het elektronisch alarm aaf. Oei, höbs get in dien tesj wo de beveiliging nog op zit. En dan höbs te twie keuzes: op de klater gaon, hel wegrenne, op de luip gaon, make dets te wegkumps of dao mit eine roje kop blieve sjtaon. Ich höb het al is gehad mit ei T-shirt van den Hema, wo-in zoe ei stripke geneijd is. Es det neet gedemagnetiseerd wurt bie den aankoup geit het alarm aaf, en dan sjteis te dao sjoon.

[C = FOUT]

Ja, höbs luuj die alles in eine winkel weite te vènje, behauve de kassa. Det zeen luuj die op de klater gaon, die op rouftocht gaon. Me neumt det ouch proletarisch winkelen. Op de klater gaon beteikent dus: op het dievenpad gaon, op sjtruiptoch gaon, de klauwhannes oethange.

[OPLOSSING = B]

op de klater gaon : maken dat je wegkomt, op de loop gaan