Waor of neet waor aflevering 569

donderdag 31 juli 2003

Paul Prikken

hiemelsvlök

[A = FOUT]

Samegesjteld waord. Neet oet den agrarische sector mer oet de de religieuze sector. Zuus twie deile in det waord: hiemel en vlök. Den hiemel det is de plaatsj wo Sint Petrus aan de paort zit óm deskundige B en C trök te sjikke nao de hèl ómdet ze de loesteraers belege. Vlök beteikent hetzelfde es rap, vlug, vlot, vreugriep: wie v'r det in de oetzending van veurige maondig höbbe oetgelag. En bès dus hiemelsvlök es te bie Sint Petrus niks in het book höbs sjtaon en rap door de paort maogs nao de riestepap mit zilvere laepelkes. Hiemelsvlök beteikent dus: ei braaf, deugdzaam, fatsuunlik laeve lieje. Besjtömd zeen veur ei plaetske in den hiemel.

[B = FOUT]

Het book van Sint Petrus is neet dik genóg óm al die verkierde antjwaorde van dich op te sjrieve. Dich bès altied rap mit dienen oetlèk, dich bès altied vlök d'rbie óm get te verzinne. Hiemels vlök det is ein samesjtelling wie me ouch 'hiemeldbreid' zaet. Dao is het: hiemelsbreid = versjrikkelik breid. Hiemelsvlök beteikent dus: versjrikkelik rap, gans sjnel, gans vlök. Precies wie ich det veurige maondig höb oetgelag.

[C = GOED]

Wie deep moos te ei graaf grave óm d'rveur te zörge det twie gepatenteerde leugebieste wie geer twie d'r neet oet kroepe? Toch minstens eine maeter. leefs twie. En dan ouch nog good de gróndj aansjtampe, want ngers geit de graafsjtein baove eure boek sjeif hange. Det kriegs te es den óngergróndj hiemelvlök is. Hiemelvlök det zaet me specifiek van gróndj dae röl en ónvas is. De gróndj is hiemelvlök det beteikent: de gróndj is zoe ónvas, zoe instabiel det me d'r bekans niks op kèn boewe.

[OPLOSSING = C]