Waor of neet waor aflevering 570

vrijdag 01 augustus 2003

Paul Prikken

vuurmuzer

[A = GOED]

't Is einen heite zoemer, mer bie mien femilie in Ech höbbe ze nog ummer de kachel aan. Het zeen dao vuurmuzers. Het gans jaor door kroepe ze kort bie het vuur. Ouch es de mösje boete doed van het daak valle, höbbe ze altied kauw veut, sjoeveringe in de rök en drage ze wolle zök. Het zeen richtige vuurmuzers. Eine vuurmuzer det is emes dae altied kort bie het vuur krup, einde dae het ummer kaud haet. Ouch in de zoemer van 2003.

[B = FOUT]

Ja, daoveur is nónk Harie failliet gegange wie hae air-conditioning in Ech wól verkoupe... Det geluifs te toch zelf neet! Luuj die midde in de zoemer nog mit wolle zök en einen euverjas bie de sjtaof zitte!

Nei, nei. Eine vuurmuzer det is gans get angers. Me zaet ouch vuurmuuske. Det is ei dreug tekste of ein dreug sjpaan vunkelhout womit me het vuur aanmaak. Es te bieveurbeeld ein duur sigaar aanmaaks dan gebroeks te ouch eine vuurmuzer. Geine zjwaegel want dan geit de sjtank van de solfer in de sigaar zitte en dan is de sigaar versjangeleerd. Nei dan sjtiks te mit diene zjwaegel eers eine vuurmuzer aan en dan de sigaar. Det is het dus: vuurmuzer is ein dreug sjpaan hout óm vuur aan te sjtaeke.

[C = FOUT]

Waal bie de lès blieve: is het noe vuurmuzer of vuurmuuske? Mer es de loesteraers noe good naodènke -waat geer twie neet doot- dan weite die det euren oetlèk kwatsj is. Väöl te wied gezóch. Vuurmuzers gebroek ederein in de keuke. Es et dien fikke neet wils verbrenne aan ein heite pan of aan einen heite kaetel dan paks te eine vuurmuzer. Eine vuurmuzer is eine pannelap. Sumpel toch. Ein heite pan. Wie moot ich det oppakke? Mit eine vuurmuzer, eine pannelap.

 

[OPLOSSING = A]

Woordenboek ven Echt: vuurmuzer, kouwelijk iemand die kort bij het vuur kruipt