Waor of neet waor aflevering 571

maandag 04 augustus 2003

Paul Prikken

eine gank water

[A = FOUT]

Ach, ach, waat waor mich det lèts ei jroos jewitter baove Kirchrao. En dao veel eine gank water oet. Klatsj, klatsj, den drasj dae kaom nao ónger mit tobbe tegeliek. Eine gank water det is dus ein stortbuuj, ein ónwaersbuuj. Me zaet ouch ein hómmelsjoel, of wie de Pruse en de hauf-Pruse in Kirchrao zèkge: ein Gewitterschauer.

[B = GOED]

Tobbe water, det waal. Mer die valle neet oet de loch. Kiek, die oetdrökking kump oet den tied det er nog gein waterleijing waor en dan sjikde me de meid nao de pómp of de waterpöt veur eine gank water. Gank mich eine gank water haole! En det beteikende: twie tobbe, twie ummers water. Zoeväöl es me in eine gank nao de pómp kós drage. En es te ein luij meid hauws, dan kaom die mit einen hauve gank trök: einen ummer. Dus eine gank water: twie tobbe water.

[C = FOUT]

Die dörpspómp det klop. Mer al de res is eine gank kwatjs, twie tobbe kwatsj, 20 liter ónzin. Want waat deeg de meid bie de dörpspómp? Bie de dörpspómp kaom ederein same en waat dege de vrouluuj dao: klasjenere, zeivere, de luuj bekalle. Eine gank water det is dus hetzelfde es wauwel, bazelerie, vertèlselkes, ónzin.

[OPLOSSING = B]