Waor of neet waor aflevering 580

vrijdag 15 augustus 2003

Paul Prikken

sjrefte

[A = FOUT]

Sjrefte det zuus te hie sóms in de kantien. Höbs van die luuj die neet weite det ze mit mets en fersjet mote aete. Veur hun is det gein bestek mer vraetgetuug. En ómdet het mit mets en versjet neet rap genóg nao bènne geit pakke ze het mer vast mit de henj of mit eine laepel. Sjrefte is hetzelfde es schransen, vraete, bónkere, sjtiefvraete. Me zaet ouch sjrefte wie eine sjurendaersen. En ze make dao ouch nog laweit bie, bie det sjrefte. Zal ich det ins veurdoon?

[B = FOUT]

Sjrefte det deis te mit de sjref. Waat is de sjref? De sjref det is ein sjaaf veur roew sjaafwirk. Kiek, es te väöl van ein deur of van einen taofelpoot moos aafsjave dan paks te iers de sjref. Naodets te mit de sjref roewweg de sjpene höbs aafgesjaaf paks te de fien sjaaf, en dan sjoerpepier. En het is vaerdig.

Sjrefte is dus: roew sjave, roew sjaafwirk doon aan hout.

[C = GOED]

Sjrefte is ein aud waord det lèts weer gans modern is gewoorte. Wèt g'r het nog, veurig jaor mit de inveuring van den Euro? Toen zeen ze de luuj gaon sjrefte. Ei pötje beer van twie gölje woort twie Euro, 'ne koffie, ei keukske. In den Horeca gónge op sómmige plaatsje de göljes geweun euver in euro's. Kiek det is sjrefte: emes aafzètte, de luuj teväöl laote betale, de luuj bedóndere, de luuj bezeike.

 

[OPLOSSING = C]

sjrefte: bedriegen, afzetten, teveel doen betalen