Waor of neet waor aflevering 586

maandag 25 augustus 2003

Wim Kuipers

Teun

Opmerking: Kort uitspreken niet als de mansnaam Teun.

 

[A. FOUT]

Teun det kump van tonen, laote zeen. Ich höb waal ins geheurd: die vrouw haet eine flinken teun: good get op 't sjaap. Det is neet algemein. Waal d'n teun dae gebroek waerde veur luuj get angers te laote zeen: sjtufkes veur sjieke kleier, kleure veur de moer te vèrve, sjtale van behang, en ouch doodsprintjes, gebaortekaertjes, det alles zit in einen teun: ei sjtalebook.

[B. FOUT]

Geer höbt waal ins van die jaortalle gezeen in aoj hoezer: 1678 of zoe. Die siefers zien van iezer, en ze dene neet um te laote zeen: doe is det hoes geboewd, nae: ze zien veur 't baeter ineinhaoje van 't geboew, veur de sjtevigheid, en die iezers, ouch wen ze geweun rech zien, die heite teun: iezers in de gevel van aoj hoezer, um de moere biejein te haoje.

[C. GOED]

Teun kump van de Heilige Antonius. Dao höbbe veer d'r twie van: dae van wen me get kwiet is en Verkesteun, fiesdaag 17 jannewarie. Nou, dae petroon hit neet veurnieks zoe: dae woor knatsheilig mae ouch zoe gek wie ei kwartje. Hae waerde al gauw Gekke Teun geneump: Antonio Follio, det is gek, dwaas, Frans fou. En hie waerde gezag wen eine raar deej: waat haet dae gekke teun: sjtrapatse, rariteite. Veur de taalkunige luuj: teun haet gein inkelvoud.

[OPLOSSING: C]