Waor of neet waor aflevering 588

woensdag 27 augustus 2003

Wim Kuipers

Rósdook

[A. FOUT]

Rósdeuk die hauw me in d'n tied van de fernuzer en de kaolesjtove. In mei leet me die oetgaon neet mie neudig veur werm te waere, boere waerde 't werm, en dan kóste die gaon róste, zeker de sjtove die in de kelder of in de biekeuke gezat waerde. Die waerde dan good ingesjtreke mit de rósdook: einen dook vól aolie, dae dus eigelik eine anti-rósdook woor. Rósdook is dus einen aoliedook taenge 't róste.

[B. GOED]

Dao höb ich nag in gelaege, in eine rósdook. Haet de mam mich vertèld zelf weit ich det neet mie, mae dao loogs te lekker in, waerde gezag. Waat woor noe eine rósdook? Aoj loestereers weite det nag: einen dook ónger de kórte ker, wo de bóttrams in loge, 't drinkes, de haverzak veur 't paerd, mae dao kós me ouch de kleiner wichter in laote sjlaope.

[C. FOUT]

Sjlaop lekker zól ich zèkge. A. haet ei bietje geliek, althans: zoe waere wäörd versjangelierd. Rósdook kump van 't Romaanse waord veur rood kiek waat op eur flesse Italiaanse wien sjteit: rosso. Noe dink geer det 't de roje lap veur de sjtier is mis. Rós, rouge, woor ein kleur, en die is ónger invloed van rós = roest get duusterder gewaore: roodbroen, de kleur van alderlei zeile die op de boerderie gebroek waerde, mae veural bie de sjmeed. Dae hauw zoe'ne róskleurige saort sjolk. Dudelik noe? Rósdook is roodbroen zeildook wo me wirkkleier van mook.

[OPLOSSING: B]