Waor of neet waor aflevering 590

vrijdag 29 augustus 2003

Wim Kuipers

Door ein däörehèk gaon

[A. FOUT]

Gans mienselike oetdrökking die väöl femilie haet. Ich neum: door een diep dal gaan, spitsroeden lopen, en die roeden, wo me mit gezjwaars waerde, det is nag nieks wen me ein hèk van sleedoorn zuut: sjlaene. Dao zitte däör aan van veer centimaeter minimaal. Vreuger gebroekde me die veur wórstepin. Mae noe de oetdrökking. Die beteikent: väöl leid, pien of anger nutte dinger mótte doorsjtaon.

[B. GOED]

Is det dan beeldjsjpraok? Ich mein: paerspien, ich haop 't noets te kriege, mae dan duis doe nieks mie, doe krunkels dich hoogoet op de gróndj, mae doe geis neet nao boete veur door ein däörehèk te banjere. Doe mós op det GAON lètte. Allei, dan is de beteikenis klaor: väöl zoe neet alles wille doon veur get te bereike. En dan zag me vreuger: dae geit door ein däörehèk veur 't gaat van ein koe te pune.

[C. FOUT]

Och och, toch weer get bieles gaeve. Doorn det is einen daore, twie däör. Mae noe loester: ei book twie beuk, mae 't is neet beukekas. Krek zoe mit sjaop: dartig sjäöp twie päöl mae neet sjäöpesjtal of sjäöpekees. Dus: det däöre kan nieks mit doren te make höbbe. Wo waal mit? Mit d'n däör, de sjtier. Dink aan Sjpaans torro det waord höbbe de Sjpaanjers hie gelaote. En dan is 't klaor wie ei kluntje: door ein däörehèk gaon is door 't hèk, d'n toen um de sjtierewei haer gaon, en det is gevierlik. Dus: door eige sjöldj zich in gevaor bringe, zich ei óngelök aandoon.

[OPLOSSING: B]

Ein anger sjoen oetdrökking: veur det maedje loup ich euver ein rótte plank baove de hèl.