Waor of neet waor aflevering 593

woensdag 03 september 2003

Wim Kuipers

Zaodreub

[A. FOUT]

Zaodreup, det is ei bietje penibel waord. Ich zal 't röstig vertèlle, den zelfs aoj kattelieke weite dit neet. Waal wiene me de ierste reup kreeg. Wen ei köppelke wól gaon trouwe, waerde det sónjis in de kirk vanaaf de praeksjtool umgerope. Sjtèl dich veur det dae kaerel aan d'n angere kantj van de Maas al ein vrouw mit wich hauw zitte dan meugde dae neet trouwe. De luuj die det wiste móste det dan nao d'n ierste reup aan pesjtoor vertèlle. In totaal kreeg me drei reupe, de lèste de zónjig veur de broelof, en dan meinde luuj die wiste wie alles zoot, dan verlangde 't maedje al nao zaod en det hoot dus in de kaffee de zaodreup. Dus de lèste reup de zónjig veur me góng trouwe.

[B. GOED]

Sjieke kwatsj, en dao zien noe al hóngerd luuj die neet wiejer loestere: doe höbs 't weer good. Waat mót ich dan nag? Probiere. Loester ein deil van die mokkeltjes van dich die van nieks wóste, neet det de miens zaod hauw en zeker neet wo, dao zien d'r get van op de kóffie gekómme. Manlief woor gaaroet niet zoe'ne heftige, hae wól bao nieks, hae woor ein zaodreub: eine kaerel dae gein kaer haet, op zich Hollesj: waar geen pit in zit.

[C. FOUT]

Sjtop efkes. De geachde collega's gaon d'rvan oet det 't hie geit um zaod mit ein D: zaad, zaaigoed ofwaal in good Limburgs: gezäöds. Mae waem zaet det? Waal ins geheurd van zaot mit ein T? Det is zout, in Remunj zaat en in Venlo zalt. Zalt, zaot det woor belangriek, veer höbbe 't neet veur nieks euver het zout der aarde, zout in de pap. En noe det reub: det kump van röbbe, ribben, 'n zaotreub haet zaot op de röbbe, is dus: eine energieke, hel wirkende kaerel.

[OPLOSSING: B]

De verklaring: wanneer je reube ofwel stoppelknolle door laat groeien, komt er een zaadstengel die zich voedt zou je kunnen zeggen met de knol zelf. Die wordt dan voos, melig, smakeloos.