Waor of neet waor aflevering 595

vrijdag 05 september 2003

Paul Prikken

loenbak

[A = FOUT]

De loenbak det is de bak wo-in de loene bewaard waere. Waat zeen de loene? De loene det zeen de wintjerkleijer. Es de wintjer veurbie is waere die opgesjlage in de loenbak. En dan kómme dao mottebel bie, want me wilt natuurlik neet det de loene door de motte opgevraete ware.

Det is het dus: loenbak, ein kist wo-in de wintjerkleijer bewaard waere.

[B = GOED]

Oots ins van Limburgse vlaaj geheurd? Echte Limburgse vlaaj, dun van deig en dik van sjpies. Kiek, es te echte Limburgse vlaaj wils make die dich aansjteit dan baks te dich die het bès zelf. Dan kóns te dien proemevlaaj of dien kroosjelevlaaj precies make wie die moot zeen. Mer noe kan het zeen dets te luij bès óm te bakke of det dienen aove te klein is óm alle vlaje veur de kirmes te bakke. Dan maaks te toch dien vlaje, dienen deig en dien sjpies en dan brings te det nao de bekker. Dae bak die aaf. Det is de loenbak. Het baksel det me vaerdig nao de bekker brink óm dao gebakke te waere.

[C = FOUT]

't Haet get mit de bekker te make, mer mier bepaold mit het transport van de bekker. Vreuger brach de bekker zien broed van hoes nao hoes mit eine loenbak, eine bakfiets, einen triportäör wie me det ouch zaet. Kèns det: eine fits mit drie rajer mit veur eine loenbak. 't Waor hel duje mer miljeuvruntjelik en gojekoup.

 

[OPLOSSING = B]

loenbak of loonbak: zelfgemaakt deeg dat door de bakker gebakken wordt