Waor of neet waor aflevering 596

maandag 08 september 2003

Wim Kuipers

Hae haet de veurhandj

[A. GOED]

Vandaag huuj is 't Maria Gebäörte. Maria Gebaore, boer zej die kaore, zag me vreuger. Noe zuut me gei kaore mie, wiewaal det de veurhandj hauw: 't aodste rech. Kump ouch in de Biebel veur, wit geer nag? Ezau of wie hoot daen aezel, dae verkoch zien rechte veur einen tejjer linzesóp. Zól ich neet doon of waat gaef geer? Doezjend euro? Ich höb hie namelik de veurhandj, ich meug es ierste get zèkge. Of angers gezag: ich höb de veurkeur. Ouch bie de vrouwluuj, umdet ich eine knappe kaerel bön.

[B. FOUT]

Gank heivers mit diene Biebel. Limbo's wiste gaaroet neet waat dao-in sjting. Nae, veer mótte nao 't Nederlandjs kieke en waal: op voorhand van mening zijn, dus: wie Hollenjers, sónger persies te weite waat, al beginne te kwekke of doon. 't Is dus neet: de veurkeur höbbe, nae: dich de veurkeur griepe, haenke de allerveurste zien, door angere weg te duje. En wie zit det mit die handj? Die woor vreuger belangrieker wie noe. 't Woor ei simbool van mach.

[C. FOUT]

Ich zól zèkge: laot L Ein dit nao de v. Dale sjikke, dan beginne ze dao te hikke. Waat eine zeiver: handj = haan. Mae ich bön waal blie det geer ei pötje höbt kónne zeivere door dees oetdrökking. Want 't waord veur heurt me bienao neet mie in dit verbandj. Loester ins wie dök euver VOORtuge gekald waert. Ich reageer dan: waat voort geer die dinger, diesel of ertesóp? Nederlandjs voertuig is natuurlik veurtuug. Me voort ei paerd haver det me 't baeter mit kan veure = leie. Hie geit 't um: leie. Dink aan d'n aanveurder dae de troepe leit. En dan sjnappe veer bienao waat die veurhandj is: de handj die veurt, leit, aanveurt. Neet allein bie 't leger mae ouch bie de hermenie, wen die marsjiere. En: hae haet de veurhandj is dan: det is de aanveurder, de gebaore leider.

[OPLOSSING: A]