Waor of neet waor aflevering 597

dinsdag 09 september 2003

Paul Prikken

wel

[A = FOUT]

Wel, wel, wel: het waord wel! Of moot ich zèkge: waal, waal, waal, het waord waal! Höb g'r al ins eine eike gebakke in de pan? Es te dat eike neet te hel biks dan höbs te op het wit van het ei nog zoe ei saort sjliem likge, zoe'n kwabbelig doorsjienende materie: dat is de wel. Ich vónj det vreuger neet lekker, want miene broor hauw mich wiesgemaak det dae wel van den haan kaom.

Mer det is dus de wel: het óngebakke of lich gebakke sjpul van het wit van ein ei. Dae blubber dus.

[B = FOUT]

Vreuger bie de scouts gewaes? Ja dan kèns te de 'welpjes', de jóng scoutjes. De jungskes die taenge hun gósting mote mitloupe mit de groete scouts. Eine wel det haet dao mit te make: het is -loester noe good- het mannelik kindj van ei bies. Bieveurbeeldj ei jónk sjtierke det pas gebaore is: det is eine wel, Eine pasgebaore bók, det is eine wel. Het is dus ein verzamelwaord óm mannelike pasgebaore bieste te beneume.

[C = GOED]

Gemaekelik óm hie de Limburgse bioloog oet te hange. Ei pasgebaore bies det is ei kauf. En ei kauf det zaet me ouch van luuj die bie het waord 'wel' einen oetlèk gaeve dae gaaroet neet klop.

De wel det is sumpel: det is hetzelfde es ein wals. Geine Wiener Walz van Sjtrauss mer ein wals womit de boer zien landj aanwalst. Zoe ei groet róndj iezere dènk, ein echte wals dus. Det is eine wel.

[OPLOSSING = C]

Wals = wel (Maaskant)