Waor of neet waor aflevering 598

woensdag 10 september 2003

Paul Prikken

kerreget

[A = FOUT]

Kererget: samgesjtèld waord. Ein get det is eine laere bandj en de kerreget det is natuurlik de laere bandj dae dae aan de börge, de berries, van ein kar is vasgemaak. De kerreget is dae breije laere bandj womit de kar op de rök van het paerd sjteunt. De kerreget.

[B = GOED]

Eine kerreget det is eine voegel. Es hae örges get blinkends zuut likge, wie ein gouwe halskèttingske, dan zaet hae taenge zien eige: 'ich ker mich get' en dan pik de kerreget det kèttinkske mit nao ziene nès. Eine kerreget det is dus hetzelfde es ein aester, ein ekster. Zjwart, wit, spisjalis óm zich vanalles mit te klauwe.

[C = FOUT]

Wie kump eine boer op zie landj? Sumpel, dènks te, langs de waeg! Mer zoe sumpel is het neet. Es noe twie sjtökker landj naevenein likge, dan moos te dao toch op gerake mit dien kar of dien ploog zónger den aanplantj kepot de vare. Daoveur deent de kerreget: det is einen óngeploogde, ónbewirkde doorgank tösje twie sjtökker landj.

[OPLOSSING = B]

kerreget = ekster. Vooral Belgisch Limburg.