Waor of neet waor aflevering 599

donderdag 11 september 2003

Wim Kuipers

Me mót de sjmouwere neet aan twie kantje sjmere

[A. GOED]

Det is ei gezèkde det weer actueel waert det zólle veer nao Prinsjesdaag waal dökker heure. 't Geit sjlech in de polder en langs de Maas. Waat mótte veer dus doon? Zjuus: de sjmouwere neet aan twie kantje sjmere, zoe wie: in de zomer de verwurming oet, neet de lamp in de kelder laote branje ofwaal: bietje zunig zien, 't geldj neet mit sjope de deur oet goje, want: overdaad schaadt.

[B. FOUT]

En waat zien dan die sjmouere? Mót ich weer verklaore: det zien die dinger die jederein haet mae die me neet kan zeen, allein veule wen d'r get mis is: de lónge. Wen me vreuger zjwaor verkaojd woor, dan sjmeerde me zich de bórs in mit sjaopereut, kump van reuzel vèt ónthaoje: euver drei maondj waert dit gevraog. Sjaopevèt dus taenge d'n hoos. Mae dan goof 't luuj die onnag ei kónjekske nome, of drei, veer sjmere hoot det, de kael sjmere, en dan versjlikde ze zich waal ins of waerde óngemoojd. Ze begóste te hooste en det deej duchtig pien. Ze hauwe neet én dae sjaopereut mótte gebroeke ploes die borrls, dus dees oetdrökking beteikent: 't middel is erger dan de kwaal.

[C. FOUT]

Zoeväöl fantasie höb ich nag zelje mitgemaak. Hoof ouch neet: 't antjwaord is einfach. 't Geit hie um ein wiesheid van boewvakkers en tummerluuj. Sjmouwere, det zien leime moere, wie me die waal bie vakwirkhoezer zuut. Die mót me neet aan bei de kantje diek besjmere mit gieps, dan verbrokkelt de leim en duvelt dich de ganse kraom inein. Noe zólt geer mesjiens vraoge: waat is 't versjil mit B det is ouch elenj. Nou, in de metselerie beteikent die oetdrökking: waat veur deze kantj good is, hoof 't veur d'n angere nag neet te zien. Of: waat mich nóts kan dich sjaje.

[OPLOSSING: B]

Ein sjmouwer is ein bótram. Kump aaf van sjmout = vèt. 't Woor de bótram veur ermer luuj, en die waert in Vlaondere dan ouch smouterham geneump.