Waor of neet waor aflevering 600

vrijdag 12 september 2003

Wim Kuipers

Sjek

[A. FOUT]

Sjek neet sjag (zo uitspreken). Die Hollenjers van v. Dale zólle ins oet mótte zeuke of 't modewaord kek neet ein reactie is op oos sjek. Waat is kek? Get wie: helemaal te gek, supergaaf eine kekke kaerel is ei bietje raar mae waal oké. In jeder geval: gunstig. Eine sjekke kaerel is óngunstig. Sjek beteikent naemelik ónvruntjelik, kórtaaf, bietje achter de moew. In Remunj heurt me nag: eine vervaelende sjekgedek.

[B. FOUT]

Ich wil iers zèkge: dit is sjiek neet sjek, nae gans sjiek det veer al aan de 600 zien. Wieväöl höb ich d'r daovan good gehad? 480 of nag mier? Noe sjek: 'achter de moew' zags doe? Eine bedreger, oplichter? Wits doe waat vreuger mit zoe'ne kaerel gebeurde? Opgepak door de garresjas, de veldjwachter, 't kotje in, deur toew, de sjek d'rop en dao zoot hae. Sjek = grendel, schuif op ein deur.

[C. GOED]

Aaflevering 600 inderdaad en veer zien nag noets zoe wied gewaes veur ei waord op te haole. Veer mótte nao aod-Perzië. Dao kump 't sjaaksjpeel vandan en wo kump 't waord sjaak ¼ zjuus: det is de sjah, de keuning wo alles um drejt, en det is bie ós sjek gewaore. Neet det det de keuning is, wiewaal det good zól klinke: sjek Willem-Alexander. Onnag eine nette Perzische naam: Alexander de Grote. Geer zeet: alles klop. Noe sjek: det is ei gevlek deer, ei deer mit meis zjwarte en witte plekke, krek wie 't sjaakbord, beveurbeeldj einen hóndj of knien.

[OPLOSSING:]

Opmerking: Dit opvallende woord staat in het woordenboek van Kerkrade, en de uitleg dat het op het schaakbord teruggaat klopt helemaal.