Waor of neet waor aflevering 602

dinsdag 16 september 2003

Wim Kuipers

Dóm

[A. FOUT]

Ha – Prinsjesdaag vandaag – dao zól det dóm waal mit te make höbbe. Waat wilt geer aan dóms höbbe: d'n dóm van Aoke, van Kölle of dae van Utreg? Allei, genóg gekwatsj: det waord kump van domus, Letien veur hoes. Dus ozen dóm, det zól waal ins ei saort hoes kónne zien – en det sjtump. Nou ja, hoes: 't is ei bietje sjpottend. Vreuger hauwe väöl luuj eine bóngerd ei sjtökske van häör hoes aaf. Midde d'rin sjting ei gemetseld huuske wo-in gereidsjap bewaard waerde waat me dao neudig hauw – hoofde me neet jederskeer van hoes mit te bringe, zoe wie sjöp, sjoefel, zaeg, sjörker.

[B. GOED]

Det höbs doe dich sjiek oet d'n dóm gezaoge, oet d'n doem, duim. Dao is dit waord mit verwantj. Loer daoveur ins nao dienen doem, wo duit dae dich aan dinke? Eier? Appelesiene? Te lestig? De nuuj brök in Mesjtreech dan? Nag neet? Ich zèk 't dan: ei eske in ei raedje, eine naaf, det is d'n dóm. En went geer det neet gluif, maak ich uch get angers wies.

[C. FOUT]

Taalkundig zeer interessant waord. Efkes verduutsje. 't Limburgs haet eine gas wäörd die op –mp eindige en die in Braobant en in 't uterste naorde van oos provins die P kwiet zien. Ich neum: kamp – kam, krómp – krom, kómp-kom. Geine zaet mie: de kómp van 't dörp. Kramp en kram haet me onnag, en det dóm haet vreuger ouch ein P gehad. In 1514 sjteit in de ridderroman euver Heinrich ende Margrite van Limborch nag dómp, en det woor eine pool zjwart water, ei moeras.

[OPLOSSING: B]

Opmerking: de uitleg van B dat dit woord verwant is aan duim, klopt helemaal.