Waor of neet waor aflevering 604

donderdag 18 september 2003

Wim Kuipers

Repkedepeu

[A. FOUT]

Det zal ich uch ins rap verduutsje. Repkedepeu is dinkelik ei sjtudentewaord, van de seminaries en colleges. Die jónges wóste vreuger get van taal. Repke kump van zich reppele, Nederlandjs reppe, dus flot zien, en dao is aangeplek 't Franse un peu, dus: ei bietje. Same waert det haast je lankzaam, of in 't Letien dao kóste ze det van: festina lente. En waat zagte veer: iers dinke, dan doon, ofwaal: zachtjes aan dan breekt het lijntje niet.

[B. FOUT]

Och och: de gelierde oethange. Sjting zeker in d'n agenda van de Hema. Nou ja, un peu geliek höbs te waal, mae det repke haet nieks mit reppe vandoon, det is 'ei reepke' in de meiste dörper. Loester: noe waert 't raekene. Repkedepeu is dus ein reep al neet väöl den ein dieke reep sjókla hit 'ei pak', en dao 't verkleinwaord van, en dao nag ei bietje van. Dus: hiel klein bietje, geringe hoeveelheid, get meer es eine laege nieks.

[C. GOED]

Sjei oet. Ich höb hie drei artikele euver det repkedepeu, en de taalkundige sjtraevele zich of repke mit ein P is of mit ein B. Dan zól 't joeds kónne zien, van rebbe, de rabbi, mae laote veer det neet haope, den die luuj höbbe 't al zoe lestig gehad, en repkedepeu is ei óngunstig waord. 't Beteikent namelik: schorriemorrie, minder volk.

[OPLOSSING: C]