Waor of neet waor aflevering 607

dinsdag 23 september 2003

Wim Kuipers

Kiksjozerie

[A. FOUT]

Loester dit waord is neet zoe lestig. Dink aan de ganse sjoos. Veurbeeldj: twie renners reje twie oer op kop, mae kórt veur de maet veel de ganse sjoos euver häör haer. Waat is sjoos dus? Ein euvermach, get wo me nieks aan kan doon, de grote hiere besjlisse, d'n duvel sjiet op de grótsten houp det is ammaol kiksjozerie. Mót ich nag mie verklaore?

[B. GOED]

Veur mich waal. Loester of kiek: in sjtaej wie Remunj en Mesjreech zuut me op einen inkele deftige winkel nag waal ins 't waord chaussures sjoon, schoenen. Dao zit sjoos in. Noe zólt geer zèkge: voetbalsjoon, die heite ouch kicks, dus in 't waord kiksjozerie zitte 4 sjoon. Zekers, en dao valle dich de sjoon van oet, of neet? En wen dich dan onnag de bóks aafvilt van verbazing, dan höbs doe wienig mie um 't lief, kiek, en det is kiksjozerie: get waat neet väöl veursjtèlt, eigelik zien det van die prullaria op de sjouw, de sjaorsjteinmantjel hit det allewiel: snuisterijen.

[C. FOUT]

Sjtinge bie uch de sjoon op de sjaorsjeinmantjel? Veer zatte die waal bie de haard, mae allein wen ze naat wore en mit Sinterklaos. Allei, dit waord, kiksjozerie, haet zeker get mit sjoon te make, en waal mit de sjoester of hit dae bie uch al sjoonmaeker? Waat is noe kiksjozerie? Dao zit 't waord sjoestere in waat noe nieks mie mit de sjoester te make haet. t Is eigelik: oplappe, of get inein fisternulle. Me kan ouch ein bóks inein sjoestere. Noe zal 't dudelik zien: kiksjozerie is get waat inein geflats is, sjlech opgelap, dudelik zichbaar gerepareerd. Ein hoes mit drei saorte sjtein, einen auto mit ein angers gekleurde deur, det saort dinger.

[OPLOSSING: B]

Kiksjozerie zól ein verbastering zien van 't Franse quelque chose pour rire, ofwaal: get dinger veur te lache.