Waor of neet waor aflevering 608

woensdag 24 september 2003

Paul Prikken

wumfele

[A = GOED]

Wumfele. Det is get waat ich en väöl loesteraers in hun keuke doon. Dao sjteit namentlik ein apparaat det dich aan het wumfele brink: den ieskas. In dezen tied van energiebesjparing moos te d'r toch zeker van kónne zeen det het lempke van den ieskas oetgeit es te de deur toedeis. Nou! Det is nog neet zoe einfach! Paks get oet den ieskas, lempke geit aan. Deis den ieskas toe... en dan begins te te wumfele. Is det lempke noe oet? Óm det te kóntrolere deis de deur weer efkes ei bitje aope. Waat zuus te? 't Lempke is weer aan! Weer rap die deur toe. En dan begins te weer te wumfele: is det lempke noe oet? Enzoewiejer. Ich kèn dao 's nachs neet van sjlaope. Det is dus wumfele: twiefele.

[B = FOUT]

Wumfele, det deit de wumfelaer. En waat is eine wumfelaer? Neet eine dae de sjernere van zienen ieskas versjlit mit häöm aope en toe te doon. Nei, de wumfelaer is ei krómp iezere mets det aan eine sjtek zit en det deent óm de sjale, de schors, van buim en haut aaf te sjtaeke. Het is dus ei saort rasp. In het nederlands: een boomontschorser.

[C = FOUT]

Wunfele det kóns et zeen es boete de wesj aan den draod hink en er ei bitje wèndj sjteit. Dan wumfele de hummes, de óngerbókse en de kammezäölkes aan de lien. Wumfele det beteikent dus: wapperen. Ein vlag, die kèn ouch wumfele. Of es te nao het aete boete het taofelkleid geis oetkloppe. Det is wumfle: wappere mit einen sjtóffen dook.

[OPLOSSING = A

wumfele: twijfelen

wumfelaer: twijfelaar