Waor of neet waor aflevering 609

donderdag 25 september 2003

Wim Kuipers

Niknak

[A. FOUT]

Niknak: det is ei wied aojer waord dan 't Hollesje mikmak. Ze höbbe dao achter de dieke oos waord verkierd begrepe. Mae veer kalle noe ouch van de ganse mikmak. Det zien de gekste dinger biejein. Niknak noe loester good, det is ouch get óngerein, mae waal óngevier van hetzelfde grei. Dus: versjillige saorte vleis, eigelik aafval van vleis, of vreuger dan saorte kaole óngerein: kleine, grote, sjtökskes, eierkaole, alles: restanten.

[B. FOUT]

Niknak det heurt bie die categorie wäörd wie tip-top, klik-klak, klits-klats, ding-dong. Mae: 't is letterliker dan me dink. Det nak is de nek, en dao zit eine knik in. Nou ja, bie wieze van sjpraeke, den eine echte knik, de nek gebraoke, bös doe d'r gewaes. Daoveur is ouch die K weggevalle. Noe kóm ich mit de verklaoring: eine niknak is eine miens, meis eine kaerel, dae sjterk veureuvergebaoge löp, geknak, eine kwartjeszeuker, of mótte veer ze noe eurosjpeurders neume?

[C. GOED]

Doe gluifs aan Sinterklaos en dich ouch ich mein A. Efkes wied weg gaon. Zjwitserlandj haet vandaag fies: naamsdaag van de petroon van Zjwitserlandj, de heilige dao kump d'r: Nicolaas. Neet oze Sinterklaos, mae Nicolaas van Fluë ofwaal zagte ze hie bie ós taenge dem: de heilige Niknak, petroon van de selderieknuup. Woveur selderieknuup? Hae hauw teen wichter veur hae introoj bie de paters. Mit zien knuup woor dus nieks mis, en daonao waerde hae eremiet, kluzeneer. Hae voojde zich doe allein nag mit de eucharistie waerde gezag hosties. En zoe gaon verhaole wiejer, de luuj fantasere d'r get bie, en went geet get naodink euver dae hostie, brood, is 't dudelik: niknak, det zien klein dreug keukskes, dök in de vörm van figuurkes.

[OPLOSSING: C]

Opm. A. bedoelde miesjmasj of mazzjerang.