Waor of neet waor aflevering 611

maandag 29 september 2003

Wim Kuipers

Hich

[A. FOUT]

Sjiek sjiek waord. Haet te make mit Wij Beatrix en zoe. De keuning zaet Wij umdet hae ich te protserig vinjt. En zoe zaet me hich wen me neet gaer ich zaet, umdet me zich sjaamp beveurbeeldj. Dan heurt me: en doe mós hich mit de batse bloot. Me zól gaer hae zèkge, mae det is vernederend, dus zaet me hich, ein kómbinatie van ich en hae, ofwaal: ondergetekende.

[B. FOUT]

Waat eine miens neet kan verzinne. Laot uch nieks wiesmake. Dit waord is femilie van 't Pruse Hecht ofwaal eine sjnook. En noe zuut me weer 't wónjer van de taal: hich beteikent bie ós neet sjnook, mer: eine magere miens, of ei sjmaalpenserig deer. Raar, den eine sjnook is neet de magerste vösj. Mae loester, ei bewies veur mich en alle Braobenjers noe belle veur B: in Kuuk = Cuyk is eine snoekebuuk ei mager paerd.

[C. GOED]

Taal is inderdaad wónjerlik. Kapeert geer uch nag ei paar maondj geleje het gevraogde waord zichte? Hauw ein vrouw en die wón geweun in de v. Dale opgezóch. Hauw ze ouch in ei Duutsj waordebook kónne doon. Alles paletti, zelfde waord. Mae waat veer noe höbbe, Limburgs HICH, det is in 't Hollesj en in 't Duutsj heft. Luft is lóch lucht, Kraft kracht, mae hie klop get neet. Dao gaon ich mich in fibberwarie in München op ein kónferens euver ensjele, mae sjtum op mich, München haet geliek: hich = heft, handjvaat van ein heep, mets, beitel det saort dinger.

 

[OPLOSSING: C]