Waor of neet waor aflevering 616

maandag 06 oktober 2003

Paul Prikken

hinneverhane


[A = FOUT]

Hinneverhane. Jóng maedjes kriege det es ze in de puberteit kómme. Dan beginne de hinkes nao de haenkes te kieke. Dan zèkge de auw luuj: oos Lieske haet het hinneverhane. Ze is dus in de puberteit, sweet sixteen, ze haet vlinders in de boek.

[B = FOUT]

Loesteraers die toes einen hinnesjtal höbbe of hinne gehad höbbe die weite waat hinneverhane is. Kiek: hinne kónne al ins van de lèk zeen. Dan lèkge ze daag lank gein eijer meer. Det kump ómdet ze zich versjrik höbbe. Bieveurbeeld es eine vleger leeg in euvergevlaoge, of es deskundige A in de sjtal gewaes is. Mer nao ei paar daag beginne ze weer te lèkge.

Mer sóms blieve de hinne van de lèk aaf: det is het hinneverhane. Bie de hin begint ei saort vreug menopauze bie hinne en ze blief van de lèk aaf. Dan zaet me: ze haet het hinneverhane. En wo eindig ein hin mit hinneverhane? Zjus: in de pot.

[C = GOED]

Loesteraers, es deskundige B ummer zoe'ne langen oetlèk haet moot g'r bènnekort al óm vief oer 's mörges de radio aanzètte. Dan moot g'r veur hinneverhane opsjtaon. Want det beteikent hinneverhane: veur dag en dauw, het ochtendgloren, het ochtendkrieken. Det is den tied es de hinne en de hane actief beginne te waere. Want hinne en hane höbbe allang flexibele wirkoere.

[OPLOSSING = C]

hinneverhane: samentrekking van de uitdrukking 'veur hin en haan opsjtaon'. Men zegt ook 'veur hinneverhane opsjtaon'.