Waor of neet waor aflevering 617

dinsdag 07 oktober 2003

Paul Prikken

touw laote

[A = FOUT]

Ein oetdrökking oet de sjeepvaart. Es eine sjipper bieveurbeeld in Maasbrach aan de kantj laog en hae zoog einen deurwaarder kómme of den inspecteur van de belastinge dan moos hae sóms touw laote: rap d'rvandoor gaon. Dan kapde hae mit de biel den tros los en voor dan volle gaas de Maas op. Ei sjtök touw det waor dan het ensigste waat bleef hange aan de paol op de kant. Det beteikent dus touw laote: d'r hals-euver-kop vandoor gaon, op de vlöch sjlaon.

[B = GOED]

Ein oetdrökking die refereeert nao de opvoedkundige methodes van vreuger. Es eine boer jóng dochters hauw en die kaome in de laeftied van 15, 16 jaor dan woort het gevaorlik. Dan bónj hae die op zienen haof vas aan ein touw, eine maeter op vief lank en dan kóste ze neet van de boerenhaof aaf óm nao de boerejónges op de sjtraot te lónke. Mer op den doer woorte die boeremaedjes toch opsjtandig en dan wólle die maedjes altied mer wiejer weg. Dan moos de boer toch touw laote, eine maeter, twie maeter. Touw laote beteikent dus toegaeve, biegaeve, zwichte, zich aanpasse.

 

[C = FOUT]

Touw laote. De dames ónger de loesteraers die weite det nog. Tenminste de dames die vreuger ei kersèt droge. Zoe ei kersèt det woort mit ein tuike sjtrang aangebónje. Mer es me dan mit eine broelof, ei kemuniefees of ein kirmes aan taofel zoot en het aete sjmaakde, dan kreeg de boek toch al ins ruzing mit det kersèt. Dan verekskeseerde de dame zich en sjtóng op van taofel. En ze zag dan: ich gaon efkes nao achter, touw laote. En dan góng ze achter op de WC häör kersèt ei paar tendjes losser zètte. Det beteikent dus touw laote: teväöl geaete höbbe, de boek róndj geaete höbbe.

 

[OPLOSSING = B]