Waor of neet waor aflevering 618

woensdag 08 oktober 2003

Paul Prikken

twie batse in ein bóks

[A = FOUT]

Twie batse in ein bóks... In het laeve sjteis te sóms al ins veur de keus. Moos veur het eint of veur het angert keze. 't Leefs zouws te het moos en de geit sjpare, mer kóns neet angers: moos keze. Bieveurbeeldj es de versjnellingsbak van dienen auto kepot is. Höbs dan twie keuzes: ofwaal ein duur reparatie die meer es 2000 euro kos of einen angeren auto koupe. Mer wie's te het ouch dreijs of keers: het geit dich altied väöl geldj koste. Moos keze tösje de cholera en de pes. Twie batse in ein bóks.

[B = FOUT]

Nei, nei, twie batse in ein bóks det geit dich op de nerve, det höbbe luuj die dich op de zenuwe wirke. Kèns dat: van die luuj die altied zèkge: van den eine kantj zouw me det positief kónne benadere... MER van den angere kantj zouw me det ouch negatief kónne bekieke. Typische kal van de Haagse politiek.

Het beteikent dus op twee gedachten hinken, neet weite waat keze, besluiteloos zeen.

[C = GOED]

Ja, nao dezen amateuristischen oetlèk moot ich hie toch weer mien weitesjappelik leech op de batse en de bóks laote sjiene. Es ich det richtig analyseer is er in ein bóks altied plaatsj veur twie batse. Niks aan de handj: es te dien bóks richtig aandeis zitte dien twie batse in dezelfde bóks, notabene eder bats in ein piep. Mer noe kump het: sjtèl dich de situasie veur wobie de ein bats van dich is en de anger bats van emes angers. En toch zitte die twie batse in ein bóks! Dan moos te dich good versjtaon mit daen angere, dan moos te toch good bevrundj zeen mit die anger bats.

En det beteikent het dus: twee handen op één buik, ónger hetzelfde lake likge, twie sjpitsbroeders die zich good versjtaon.

 

[OPLOSSING = C]