Waor of neet waor aflevering 621

maandag 13 oktober 2003

Paul Prikken

het paerd sjpele

[A = FOUT]

Ja, ich moot hie altied het paerd sjpele. Ich moot hie altied het veurtouw numme, ich moot altied es ierste aan het wirk. En dan höbbe die angere het gemaekelik. Ze kónne röstig aafwachte waat ze gaon zèkge.

Het paerd sjpele beteikent dus: het veurtouw numme, de spits aafbiete. Wie het paerd det altied veur de kar moot loupe.

[B = GOED]

Doe wils altied de ierste vioel sjpele. Det is get angers. Mer moos toch ouch neet verwachte det ich veur dich het paerd gaon sjpele. Det höb ich mich aafgeleerd óm veur anger luuj het paerd te sjpele.

Het paerd sjpele beteikent: misbroek waere óm het wirk veur anger luuj op te knappe.

[C = FOUT]

Ja, wae vreuger ei bitje in de bijbel gekeke haet, dae wèt het waal. Kènt g'r het paerd van Christus? Det waor dus einen aezel! Mer waat zuus et dèks bie richtige aezele: die spele het paerd! Die doon zich sjlummer veur es ze zeen.

En det zees te dan ouch in ei gezelsjap wo de grootste sjtómmerikke meistes het grootste waord höbbe: "Jóng, doe moos hie neet veur paerd sjpele. V'r weite waal dets doe dao gein verstandj van höbs!."

 

[OPLOSSING = B]