Waor of neet waor aflevering 623

woensdag 15 oktober 2003

Paul Prikken

verdauwe

[A = FOUT]

Verdauwe. Wirkzaam luuj die sjtaon veur daag en dauw op óm aan de sjlaag te gaon. Mer höbs ouch luuj die den daag verdauwe. Die blieve in hun bèd likge en zeen mit geine sjtek aan de gank te kriege. Det is verdauwe: faulenze, lanterfante, lummele, luieren.

En ich höb gein name geneump, mer hie naeve mich zit emes versjrikkelik te gape.

[B = GOED]

Kiek, eine minsj moot ziene sjlaop höbbe. Al det jachte en jage is nörges good veur. Het is ouch sjlech veur diene maag en dien derm. Nao het aete moos te siësta haute óm dien bótramme te verdauwe. Det is gezóndj. Verdauwe beteikent dus vertaere.

Luuj die sjlech verdauwe die kriege gegarandeerd eine maagzjwaer.

[C = FOUT]

Verdauwe det is minsjelik. Ederein deit in zien laeve waal ins sjtómmiteite en es te dao later aan trökdènks dan wils te die het leefs verdauwe, wegduje, óngerdrökke, verdrènge.

Ederein deit det waal ins mit sjlechte herinneringe: die wils te het leefs verdauwe, neet aan dènke, doon es went het noots gebäörd is.

[OPLOSSING = B]