Waor of neet waor aflevering 624

donderdag 16 oktober 2003

Paul Prikken

wittere

[A = FOUT]

In Kirchrao höbbe ze det dèks aan de handj: ei Jans Jroos Jewitter. Dan wittert het baove Kirchrao. Wittere is dus ónwaere. En vraog mich neet woveur het ummer wittert baove Kirchrao en örges angers neet. Het moot toch zeen det 's Levenhier de luuj van Kirchrao neet gaer zuut. Daoveur leet hae het altied wittere baove Kirchrao.

[B = FOUT]

Wittere is ein sametrèkking. Het besteit oet 'wit' en 'tarre'. Dus beteikent het hetzelfde en wit kalke. Ein moer wittere is dus ein moer wit kalke, ein moer wit verve. Kóns ouch zèkge: ze zeen de waeg aan het wittere es ze baezig zeen witte sjtrepe op de waeg te sjildere.

[C = GOED]

Höbs te al ins gekeke nao de reklaam van wesjpoejer: wast witter dan wit! Wit is wit, mer het kèn nog witter. Mer es te good kiks nao de foto van zoe ei wit humme, dan mirks te, dan witters te, det dao get neet klop. De humme is leech blauw. Kiek: es te ein sjerpe opmirkingsgaaf höbs -wie ich- dan kóns te direk wittere es dao boervernäökerie in het sjpeel is. Wittere beteikent dus: opmirke, bemirke, in de gate höbbe.

 

[OPLOSSING = C]