Waor of neet waor aflevering 626

maandag 20 oktober 2003

Wim Kuipers


Zjweitser

[A. FOUT]

Geen geld geen Zwitsers zaet 't sjpraekwaord. Wen me neet betaalt, krieg me ouch gei personeel, en vreuger wore det: sjeldaote. De Zjwitsers gólje es de bèste sjeldaote - nou ja: get wie det beer mit ouch ein EI in de naam, ich kan 't neet door de kael kriege. Allein de paus, dae gluifde in die Zjwitsers, dae haet noe nag de Zjwitserse Garde, geer wit waal die luuj mit die vaere op d'n hoot, die zoe lieke op ¼ ja: op de kirkeplies, dae ouch suisse hit: Zjwitser. Det is Frans. In sjtreke die get mie Pruses wore, wie in Tegele en zoe, dao neump me dae man zjweitser. Dus: eine zjweitser is eine suisse, kirkeplies, en hie in Mesjreech is det koeraezel, ocherm.

[B. GOED]

Ich mót dich geliek gaeve det det van die dapper sjeldaote, det det kwatsj is. Die Zjwitsers hauwe neet ins sjeldaote of ei leger: dao kós geine kómme tösje die hoog berg, en angers wólle ze det neet. Nae: veur mótte dinke aan waat de Zjwitsers genóg höbbe: kuuj en nag ins kuuj. Dao haet 't waord zjweitser mit vandoon. Eine zjweitser, det woor eine jóng dae hel mós poejakke op ein boerderie, zich in zjweit wirke ónger de kuuj. 't Woor dus eigelik eine kojboj wie veer zachte.

[C. FOUT]

Hel wirke bie de kuuj. Die kaerelkes hoofde allein te zörge det häör de kuuj neet weglepe. En zjweit? Wo krieg me de meiste zjweit van: van wirke of van de hits? Zjuus. En wo woor 't heit? Ónger in de koel. Dartig grade en mie. Ich zèk uch: dan wirk me leefs in de blote pens. Mae det moogde neet in de meiste koele. Neet netjes. Dus hauwe ze eine zjweitser aan: ei humme veur de zjweit op te vange, det dae dich neet euver de rök leep.

[OPLOSSING: B]

Dat hemd dat C bedoelde heette: sjtuubke, zjweitsjtuubke of zjweitkeelsje. Kieltje.