Waor of neet waor aflevering 631

maandag 27 oktober 2003

Wim Kuipers

Merketón

[A. GOED]

Merketóns det is 't miervoud, det zien ja det is neet euveral geliek waat det zien. Hie en dao heurt me: det zien abrikoze, appelekouwe zoegezag, mae merketóns zien dieker. 't Zien dieke gael peerze, perziken, ouch peze geneump. Waat duit noe aan abrikoze dinke? Die gael kleur, en veural: ze höbbe ein dieke hel sjaal, krek kertón. Dao kump det waord vandan: van kertón.

[B. FOUT]

Dich al ins aafgevraog wo die peerze en abrikoze vandan kómme? Zuud-Frankriek. Hie woor 't vreuger te kaod veur det grei. Noe nag zuut me in de Ardèche hóngerde bungerds van abrikoze. En dao vlege van die sjiek gekleurde veugel baove, die die dinger gaer löste. Ouch veugel van dae kantj, det zuut me aan de kleure. Hie is alles broen, gries of zjwart. Hollenjers hauwe die veugel vreuger neet, en daoveur neumde ze die Vlaamse gaai: Vlaondere woor veur häör al 't zuje. Dus: merketón is ein Vlaamse gaai, of dich det gaajt of neet.

[C. FOUT]

Nae jónges, det is hetzelfde waord wie neet sjrikke: maarschalk. Det is noe eine hoge piet in 't leger, dink aan veldmaarschalk, mae det maar is oze merrie, ein maer, wo ouch 't waord nachtmerrie vandan kump. Vreuger woor maarschalk eine paersknech, mae dae deej van alles. Ich neum: de offesere dröpkes gaeve sjnaps dus, veur de zenewe, en neumde veer eine merketón: paersknech en manusje van alles in 't leger.

[OPLOSSING: A]

B. bedoelde markoef of merkoef.