Waor of neet waor aflevering 633

woensdag 29 oktober 2003

Paul Prikken

blauw doeve, blauw jónge

[A = FOUT]

Ich weit hie vanteveure det de anger deskundige vanalles gaon fantasere óm mienen oetlèk aaf te krake. Mer det kèn mich niks verrekke, det kèn mich niks verdómme. Ich gaon mich dao neet meer meug aan make, ich laot het blauw-blauw. Blauw doeve, blauw jónge. Het leut mich ónversjillig, ich laot het blauw-blauw, ich gaon dao neet meer taengenin.

[B = GOED]

Good... woveur zous te dich ouch meug make es te toch altied de verkeerden oetlèk höbs! Het zit bie uch in de femilie óm altied op het verkierde paerd te wèdde. Diene pap, diene bómpa det waor hetzelfde saort: altied het grootste waord en later klopde d'r niks van. Blauw doeve, blauw jónge. Den appel vilt neet wied van de boum. Het zit bie uch in de femilie.

[C = FOUT]

De doevemèlkers ónger te loesteraers die sjtaon noe al bie den tillefoon te wachte óm es ierste de nummer te dreije. Die weite det me van blauw doeve neet altied blauw jónge krieg. Det kèn nogal ins versjille. Óndet de doeverasse zoe gemingd en doorgekweek zeen kump er dèks oet het ei ein anger doef es zienen pap of zien mam. Blauw doeve, blauw jónge beteikent dus: me kèn den oetsjlaag neet veursjpelle, kóns neet vanteveure zèkge wie get oetpak.

 

[OPLOSSING = B]