Waor of neet waor aflevering 635

vrijdag 31 oktober 2003

Paul Prikken

veur de borde kómme

[A = FOUT]

't Is natuurlik fein es luuj op visiet kómme. Mer höbs van die luuj die kómme ummer op bezeuk taenge det het aetestied is. Óm ein oer of twelf 's middigs, óm ein oer of haufveer taenge de veeroereskaffee of óm ein oer of zès es te het aovesaete aan het klaormake bès. En dan kóns te neet angers es vraoge: aet g'r get mit?

Det zeen luuj die veur de borde kómme. Het zeen ei bitje klaplopers. Ze kómme op visiet óm get te aete of te drinke te kriege.

[B = FOUT]

In de gooj richting mer toch gans verkierd gesjaote. Die klapluipers, die pintevaegers van dich die mote waal ei good horloge, eine goje wèkker höbbe. Timing is alles. Want es te te laat kumps, dan kumps te veur de borde. Dan zeen de teijers laeg en is er niks meer te haole. Det beteikent: veur de borde kómme. Het fees is veurbie, d'r is niks meer te haole. Bès te laat.

[C = GOED]

Ich zal mer ins veur de borde kómme mit mienen oetlèk. Ich höb mich dae kwatsj röstig aangeheurd en noe kóm ich veur de borde. Noe sjmiet ich mien argument op taofel. Ich zjwieg neet meer, ich kóm veur de borde. Ich kóm d'r eerlik veur oet det de oetdrökking 'veur de borde kómme' sumpelweg beteikent de waorheid op taofel bringe, get op taofel sjmiete.

 

[OPLOSSING = C]