Waor of neet waor aflevering 637

dinsdag 04 november 2003

Paul Prikken

zich euverloupe

[A = FOUT]

Ich waor lèts op ei fies en dao hauwe ze ei loupend buffet. Naja, het waor neet het buffet det leep mer de luuj die lepe. Höbs det al gezeen: het heisj loupend buffet en toch moos te zelf loupe óm get te kriege. En waat gebäört es het loupend buffet aope geit? Dan euverloupe de luuj zich. Ze loupe zich óngerstebaove óm toch mer veueraan te sjtaon. Zich euverloupe beteikent dus: zich óngerstebaove loupe.

[B = FOUT]

Jao, ich höb bie ein bank ouch ein loupende raekening. Jedes kier es ich op de bank kóm vraog ich of mien raekening nog neet weggeloupe is. Meistes is allein het geldj weggeloupe en is de raekening er nog... Mer good: zich euverloupe beteikent 'wiejer sjprènge es diene sjtek lank is'. Get aanpakke waat me neet kèn. Get doon woveur me ofwaal de bekwaomheid neet haet ofwaal het geldj neet haet. Es me zich ein hoes köp mit ein hypotheek die men neet kèn aafbetale dan euverlöp me zich, en dan is die loupende raekening bie de bank rap laeg.

[C = GOED]

Nei, nei. Det euverloupe det kump nogal ins veur bie naobers, bie 'buren'. Kèns det: bekans ederen daag Fientje en Trientje biejein óm koffie te drènke. Same nao de winkel, eders keer mitein belle es d'r ouch mer eine mökgesjeet gebäörd is. En opins sjeijt det oet, dan zeen ze zich inins zoe meug wie de pes. Det kump ervan es me zich euverlöp.

Det beteikent: zich euverloupe. Teväöl mitein ómgaon, zich teväöl zeen.

 

[OPLOSSING = C]