Waor of neet waor aflevering 639

donderdag 06 november 2003

Paul Prikken

sjrómp

[A = GOED]

De sjrómp det is ei muziekunstrument oet de zestiger jaore. Toen hauws te nog alderleij muziekbendjes wo-in d'r altied eine zoot dae gein verstandj hauw van muziek en dae lete ze dan op de sjrómp sjpele. En waat is die sjrómp?: die sjtómp det is ei wesjbraet, ei wasbord. Zoe'n zènke geribbelde plaat, die moder de vrouw vreuger gebroekkde óm het lievend in de wesj te sjoere. Mer noe haet ederein ein automatisch wesjmesjien. Dus es te nog ins ein sjrómp wils zeen, dan moos te nao ei popconcert.

[B = FOUT]

Dao loestere hie väöl opa's en oma's nao dees oetzending en jedes kier es die veur deskundige A keze geuf det gezinsdrama's. De kleinkinjer sjame zich kepot es oma weer ins het verkierde antjwaord haet gegaeve. Nog waeke aan ei sjtök moot het kleinkindj dan op de kaksjool heure: dien oma hauw het weer verkierd! En al de oma's die noe loestere die weite verreks good det ein sjrómp gei wesjbraet is mer van die zieje, kante bäördsels aan ei klèdje of ein bloes. Det is lestig óm te sjtrieke, dae sjrómp. Waal sjoon en defig dae sjrómp.

[C = FOUT]

De sjrómp det is de nachmerrie van eder gooj hoesvrouw. Bie alles waat ze in de wesj deit moot ze naodènke: wie heit maog ich det wesje? Veertig graode, zestig graode, tachtig graode. Want es te get te heit wesj dan krup de sjrómp erin. De sjrómp is de krimp. Wolle zök die sjrómpe es me ze te heit wesj.

[OPLOSSING = A]

Maastricht: sjrómp = wasbord

krimpen = sjrumpele