Waor of neet waor aflevering 642

dinsdag 11 november 2003

Wim Kuipers

De kan oet höbbe hange

[A. FOUT]

Det is nag get vreug, noe de kat al oet höbbe hange. Mót nag kómme: vanaovendj laat. Geer wit waat 't huuj is: 11-11, en dan waert zich hie en dao eine duchtige gepaaf. 't Guf luuj - manskaerels meis, die kónne neet mie, die höbbe de veuring oethange, zoe höbbe die gezaope. Noe hauw me vreuger alle drank in kanne, en eine dae ram aan woor, dao waerde van gezag: dae haet de kan oethange: zoeväöl gezaope, dao kan nieks mie bie.

[B. GOED]

Zólt geer neet zèkge en ich höb 't nag noets dörve zèkge, mae ich höb ei tiedje veur veedokter gelierd. Neet lang: det woor mich get vies. Ein koe beveurbeeld die de kan oet hauw hange. Zoeget krieg me wen de sjpiere die de baalmoor - zagte veer, de baarmoeder van ein koe, wen die sjpiere sjlapper zien gewaore. Dan kump ein deil van det grei nao boete, wie eine roje ból, dae dök onnag óntsjtaoke is, proos. Ich mein wen me det zuut, hoof me nieks - óf viefteen glazer beer.

[C. FOUT]

Waat luuj zich neet bedinke kónne - neet te gluive. En 't is zoe einfach. Me mót dees oetdrökking geweun letterlik numme: ei sjildje mit ein kan d'rop, det boete aan de gevel van einen herberg hóng. Noe haet me dao gein epaarte oetdrökking veur neudig, zól me zèkge. Waal wen dao get loos woor - en det woor zoe. Luuj die gelaegenheid gove, klandestien drank sjinke en meis onnag lichte dames d'rbie, flótsje geneump, die hauwe die kan aan d'n achterkantj van de kaffee hange, det de sjelderme det zoegenaamd neet zoge. Zoegenaamp: die wóste det, die krege häör dröpkes sjtiekem, allein de börgemeister, dae hauw nieks in de gater. Dus die oetdrökking beteikentj: laote zeen: hie kan me in 't geniep drank kriege.

[OPLOSSING: B]