Waor of neet waor aflevering 644

donderdag 13 november 2003

Wim Kuipers

Gaffeleer

[A. GOED]

Gaffeleer - det zal waal gaffelaar in 't Nederlandjs zien, mae det besjteit neet. Waal Jan van Schaffelaar, geer wit waal, dae van `dan liever de lucht in', en hae leet zich mit zie sjeep de lóch in vlege. Hie haet eine Jan de Gaffeleer gelaef, in d'n tied van de Boekeriejers. Die keme op veur d'n erme, zag me. Waat zie roufde, det zólle ze aan erm luuj gaeve. Jaja. Ze ratsde geweun bie de boere, en eine boer, dae leet zich neet euvervalle, die greep zich de gaffel en sjtook van die Boekeluuj aan zien gaffel - dan zoge die d'roet wie eine sjpies. Dae boer haet later enorme indrök gemaak, en waat gebeurde? Eine man dae sjobbe - det zien schoven - of hui opsjtook mit de gaffel, dae waerde daoveur gaffeleer geneump.

[B. FOUT]

Van Schaffelaar, leet dae zie sjeep? Wo bös doe op sjool gewaes? In Finlandj? Dae man dae zich mit zie sjeep opblees, det woor Van Speyck - ja? Dan gaef ich dich wiejer ei bietje geliek: gaffeleer haet zeker mit gaffel te make. En det waord gaffel is hetzelfde wie 't Duutsje Gabel. En det - lèt op, det gebroeke die ouch veur versjet of vork. Noe heurt me noe nag hie en dao: dae haet ein moel wie ein gaffel. Bietje verkierd naogedach, den ein gaffel haet gein moel.Wie zit det? Zjuus: eine laepel brink aete nao de móndj, en wen det väöl gebeurt, eine kaerel dae it en it, zich vólprop, dan zaet me: waat eine gaffeleer: eine ónbesjoefde vraetzak, vólpropper, veelvraat.

[C. FOUT]

Me mót get van de natuur weite veur dit waord te begriepe. Wiewaal: gaffelere - of gaffeleers, die kómme ouch waal ins de hoezer binne. Det zien van die broen deerkes die achter aan 't lief twie sjpriete höbbe, aanhingsels die op ein gaffel lieke. Of ouch op ein tang. En noe weite de kinners al waat eine gaffeleer is: eine oorwórm.

[OPLOSSING: A]

C. had het over gaffeltang of -tand, een Saksisch woord voor oorworm.