Waor of neet waor aflevering 648

woensdag 19 november 2003

Wim Kuipers

Wis

[A. FOUT]

Wen me in Berg mit 't vaer euver de Maas geit, kump me in Sjtokkem, en dao zuut me 't mezeijum De Wissen. Naeve väöl Maasgedoons guf 't dao ein aafdeiling vlechwirk, wo me van eine wis witse - angers gezag: een bundel twijgen, dao maak me manje van, körf, en me zuut onnag eine echte wis: ein grote manj, ouch vaatsmanj geheite, wo inins ei vaat aerpel in góng: óngevier 80 kilo. Mie kós me neet höffe.

[B. FOUT]

Wis: taalkundig ei sjitterend waord. Me wit neet genau wo det vandan kump. Aan det genau heurt me al det 't waal van d'n angere kantj van de päöl aangewejd zól zien. Mesjiens. Me dink det dao Wiese in kan zitte: ein wei, mae aevezoegood weiss: de kleur wit. Rómmel die óngerein, `t wit en de Wiese, de was op de wei zoegezag en me krieg de wis: de bleik.

[C. GOED]

Wis en waarachtig, ei sjiek waord. Me kan de luuj ouch nag WIS make - ich mein wies make, det 't mit wissen ((((((Duits oetsjpraeke)))))) te make haet: weite. De wis is dan: waat me wit, in 't köpsje haet. En waat höbbe väöl luuj - hie neet, achter de dieke, waat höbbe die dao zitte? Sjtreu. Me zaet: die zien zoe sjtóm wie sjtreu. Noe höb ich nag noets bie eine sjtreu oet de ore zeen kómme. Uch daoveur al aafgevraog waat sjtreu woor veur 't sjtreu is? Zjuus: ein boesjel of eine sjob kaore, weit, gaers. Wen me dao de korrels oet vlaegelt, krieg me sjtreu. En wo zitte die sjobbe? Inderdaad: in de wis: de ruumte in de sjuur wo de vröchte likge die gedorse mótte waere.

[OPLOSSING: C]