Waor of neet waor aflevering 649

donderdag 20 november 2003

Wim Kuipers

Gelenk

[A. GOED]

Gelenk: det waord is veural bekind van de oetdrökking: jóng ich sjtamp dich dalik ónger die gelenk. Det kan lilk pien doon, en me haet dan ouch rap ein rooj kaart wen me det bie 't foetballe duit. Woveur duit det pien? Zjuus: dao is de zaol van de sjoon minder diek. `t Gelenk is 't sjtök ónger de sjoon tösse de eigelike zaol en de hak.

[B. FOUT]

Sjiek gezag, mae ich höb nag mit mien zaole in 't gelenk gesjtange. Det waord is al weer weg, krek wie de LP. En wie lang doert de CD nag? Woveur is 't gelenk weg? Boere höbbe dao geinen tied mie veur. Wen me vreuger mit de zich góng mejje, begós me geweun aan de waeg. Idem dito mit aerpel oetdoon mit de reek. Doe keme de mesjiender veur te ougste, en dao mós me ein baan veur vrie make, mit de reek of de zich. Die baan naeve ei sjtök aerpel, gers, kaore, krotte, det veurwirk det 't mesjien kós beginne, det woor 't gelenk. Noe höbbe de mesjiender 't mets van veure, of ze rieje geweun nao binne. Wen det ouch ei bietje sjaaj guf, det is goodkouper dan ei gelenk make. Daoveur besjteit 't gelenk neet mie.

 

[C. FOUT]

Doe bös mich eine linkmichel doe. Linkmichel kump van linke - det is sjael kieke en dök ouch: loere. Bie drinke heurt gedrenks, bie linke gelenk of gelenks - heurt me ouch waal. Ei gelenk is get veur baeter te kónne loere, det zit veur op de luip van ei gewaer, en in het Hollesj weite ze dao nieks baeters veur es d'n haan.

 

[OPLOSSING: A]