Waor of neet waor aflevering 651

maandag 24 november 2003

Paul Prikken

loupsjans

[A = FOUT]

Kóns sjans höbbe, gelök höbbe, mer kóns ouch loupsjans höbbe. De loupsjans det is ein gelegenheid die zich mer eine kier veurdeit. Moos de kans pakke op het moment det ze zich veurdeit, moos het iezer smaeje es het heit is, diene sjlaag sjlaon es de kans dao is. Det is de loupsjans: noe de kans pakke angers is het te laat.

[B = GOED]

De loupsjans det is ei mirkwaerdig natuurversjiensel woveur de gelierde nog geinen oetlèk hhöbbe. Vreuger -op de boerenhaof- heijs te eine sjansenhoup. Mer dèks, es de boer 's mörges opsjtóng waor dao ein sjans weg, dan waor ein sjans gaon loupe. Meistes vónj de boer die sjans dan weer hónderd maeter wiejer trök, goof ze einen dreij óm de ore en lag ze weer trök op de sjansenhoup. "En noe blieve likge!", zag hae dan. Mer daags d'rop waor die sjans weer gaon loupe.

En noe kump den oetlèk veur mien verklaoring: es dae boer dochters hauw dan gónge die maedjes het gedraag van die loupsjans immitere. Wie de loupende sjans waore ze altied op sjtap. Dan zag de boer: mien dochter is ein loupsjans. Het beteikent dus: ei maedje of ein vrouw die gaer op sjtap is, die neet toes kèn blieve.

[C = FOUT]

V'r höbbe hie al het loupend buffet gehad en de loupemnde raekening en noe ouch nog de loupende sjans! Wèts te waat ein sjans is? Dan moos te mer ins nao het sjansespringe op twiede krisdaag in Kitzböhel kieke. Det is ein sjkisjans. Mer höbs ouch ein loupsjans. Det is ein houte sjtankètsel, eine planke vloer of ein planke vootpaad det me euver drassige gróndj of modder lag óm mit dreug veut en sjoon klómpe aan den anger kantj te gerake. De Pier in Scheveningen, bieveurbeeld, det is ouch ein loupsjans.

 

[OPLOSSING = B]