Waor of neet waor aflevering 653

Woensdag 26 november 2003

Wim Kuipers

Pollevie

[A. FOUT]

Vurge waek höbbe veer hie wis gehad - wis geer det nag? Det woor de ruumte in de sjuur wo 't óngedorse kaore en haver en zoe loog. Noe loester: in die grote ruumte - ruumdje mót ich eigelik zèkge, dao hauw me dök ei hok mit eine zölder en ein deur oetgesjpaard, wo-in de zoermoospot sjting, de kuup mit sjpek, en dao loge de aerpel veur eige gebroek. Det woor de petattekelder- neump me die ruumdje in 't naorde, op anger plaatse ouch: de pollevie: petattekelder, hok in de sjuur, in 't gebóntj.

 

[B. FOUT]

Ze make 't ós waal lestig de lèste waek. Noe weer pollevie. Me mót hiebie aan eine graaspol dinke, eine poes graas, wo me zich waal ins aan sjteut, aan zoe'ne knoebel graas op de paad. Noe kump `t: miense mit eine knoebel aan de veut, of ei eksteroug, dao waerde vreuger epaarte sjoon veur gemaak, sjoon mit ei kuulke in de zaol. En wie deje de sjoesters det? Dan lagte ze ei klein knäökske of vingerkootje op de leis - de leest, dao-euver 't laer veur de zaol, en dan kreeg me vanzelf ei kuulke in de zaol. Det knäökske of bulke op de leis, det is de pollevie.

 

[C. GOED]

Och och - bös die waal ins bie eine echte sjoester in de wirkplaats gewaes? En dan neet in ei boeredörp, nae eine sjieke sjoester, dae veur deftige dames wirkde, of mesjiens waal veur veuraorlogse homo's die doe nag geine naam hauwe. Die droge dök krek wie de deftige dames sjoon mit eine hoge hak, en dae hak, det is de pollevie.

[OPLOSSING: C]