Sjpaans blood

Het Limburgs blood dat is 100% zuver. D'r zit aaf en toe waal ei paar persent beer in. Mer ouch op ei sjöttefees zits-te mèt 95 persent blood en 5 persent Brand nog altied op de vol hònderd persent Limburgs Eige en hoofs-te gaaroet geine sjrik te höbbe es de plisse dich laote blaoze.

Ei zuver ras hoog haute brunk väöl verplichtinge. Kènjer groottrèkke is in Limburg väöl lestiger es in de res van het landj. Es de flökjung beginne te vrieje geit het dèks mis. De dochter vilt op eine sjtieve keeskop en de zoon kump mèt ein Hollese rabbel toes. Dan is het aan de pap en de man òm hun kènjer de leefde oet de kop te kalle. Desnoods de leefde d'roet te hauwe. Dat is pienlik, mer angers zitte de pap en de mam later mèt kleinkènjer diej ze neet kònne versjtaon.

Dat brunk òs biej de vraog: is integratie meugelik? Maog ein trouweriej doorgaon es het Limburgs blood dao verrungeld wurt wiej sjlech beer? De pestoors haute in dees zakes de poot sjtief. Es ze op de trouwmès neet dudelik 'jao' heure, pakke ze zich biejein en geit het fees neet door. Zie weite dat van gemingde huwelike niks goods kèn kòmme! Het probleem zit aevel biej de börgemeisters. Diej wille vouk nao hun gemeinte trèkke òm zich òngerein te kònne sjtrotse wiej hunj mèt de meiste vleuj. Op sòmmige gemeintehoezer maoge de trouwers rope waat ze wille. Jawohl, yes, da-da, si-si: de börgemeister vundj het allemaol good. Ouch es de computer van de börgelike sjtandj vassjleit op vraem name wiej Kamosjinsky, Brlzbynowsky en Sipkema.

Noe is het ei gelök biej ein òngelök dat in Limburg allein het trouwe in de kirk tèlt. Menkes en wiefkes, diej allein mer veur de wèt getrouwd zeen, maoge neet biejein sjlaope en zeker gein kènjer òngerein make. Mer hiej en dao zeen d'r börgemeisters diej dat zogezag 'vergaete' te vertèlle in hun toesjpraok aan de jònggetrouwde. De bisjop in Remunj haet al ei paar van diej batterave op het breefke van den duvel gezat. Mer zolang es diej neet aan de riej zeen veur hun sjich nao de hèl blieve ze doorgaon.

Òm hun eige òngeveug good te kalle zègke diej börgemeisters noe dat het Limburgs blood in vreuger tieje al dèks gemink is mèt dat oet anger lenj. Veural met Sjpanje, want de Spanjole höbbe hiej ei paar hònderd jaor gezaete. Zuus-te dat al veur dien ouge? Ramon de las Peñas in 1678 mèt Marieke van de sjnieder nao de kirmes in Sjtein. En José Casares dae Nelke van de sjoester sjlechte gewèndes leert achter de moer van het kirkske in Aelse (Caballero-sigrètte rouke, bieveurbeeld).

Dat kèn toch neet, dat òs grootmoders òs zoget höbbe aangedaon! Noe is het natuurlik puur toeval dat in Aelse en Sjtein de ènsigste Limburgers laeve diej 'Torremolinos', 'torreador' en 'por favor' mèt de rollende Sjpaanse 'R' kònne oetsjpraeke. Mer dat höbbe diej zich waarsjienlik mèt de cursus Sjpaans van Teleac geleerd.

Aan geinziej van de Maas, op het Belsj in Grimbie, lik nog ei gehuch dat Klein Sjpanje heisj. De luuj kieke dao get dònkelder oet de ouge vanònger hun paekzjwart haor. Ze kòste zich dao vreuger ouch get rapper opriete en guftig kaod waere. De Belsje zjenderme krege het al Sjpaans benauwd es ze in daen hook van Grimbie mooste zeen.

Toeval of neet: keuning Boudewijn zeliger haet presies dao mèt zien Sjpaanse Fabiola ein huuske geboewd. Nao het sjient kump dao noe ei klooster mèt Sjpaanse begiene. Geit de gesjichte zich dan angesjeròm herhaole?... Sjeng van de mölder mèt Isabela della...