Limburgs Eige

Het Limburgs Eige, dat is van òs en van òs allein. Limburgers weite dat het besjteit, mer höbbe het nog noots gezeen. 't Is zo get wiej het Heilige Graal, en het moot örges in Limburg te vènje zeen. Ònger de gròndj of baove de gròndj. De dialekvereiniging Veldeke meint dat het ònger de gròndj lik. Wiej de ridders oet de middeleeuwe zeuk het besjtuur zich te barsjte van Vènlo tot Mesjtreech nao het Limburgs Eige. Geinen aannummer kèn ein sjöp in de gròndj sjtaeke of eine van Veldeke sjteit d'rbie òm mèt te kieke.

Angere dènke nujerwèts en meine dats-te het Limburgs Eige baove de gròndj moos zeuke. Ouch diej zitte neet sjtil. Lèts meinde nog eine dat hae het Limburgs Eige langs de Riekswaeg tösje Maasbrach en Lin gevònje heij. Het zoot dao achter ein vinster mèt ein rooj buuslamp. Wiej het gans kommitee ter plaatsje waor bleek dat het kèndj gei Limburgs mer Russisch kalde. Weer niks.

Het Limburgs Eige wurt noe euveral gesinjaleerd: gereïncarneerd in eine börgemeister, achter de kassa biej ein benzienpòmp, es Natasja van de 06-lien, achter den tap op ei sjöttefees of mèt twee nietjes in häöre boek op de bènneste blajer van de Playboy. Jedes keer wurt serjeus naogegange of het waal òm het richtige Limburgs Eige geit. Mèt al dat kultureel wirk zeen hauverwaegs het jaor de subsidies van de provincie op. Väöl dialekleefhöbbers gaon dan op eige gelaeg door mèt zeuke. Es hun vrouw hun neet de wach heij aangezag, zouwe ze wiej Lancelot op ei paerd kroepe en alle plaatsje oetkömme wo het Limburgs Eige zouw kònne zitte.

Al mèt al blieve veer mèt de vraog zitte: wiej zuut het Limburgs Eige oet? Is het eine kroekesjtop of ein panlat? Is het zo kruutsfideel wiej ein versjlaete begien of is het ein flòtsj diej de kaels de kop wildj maak? Woont het Limburgs Eige nog op häör eige, zit het in ei pensjenaat, in het brodersjap van Sint-Anna, of haet het aan jedere vinger teen vriejers hange? Is het nog jòngfer en maagd of truk het zich zelf zien Ingelse jeskes oet den automaat veur het geval dat...?

Allemaol pienlike vraoge wovan einen houp klatsjerie en tekekal ònger de luuj kump. Òmdat de 3000 lede van Veldeke allemaol ein eige meining euver het Limburgs Eige höbbe, hauwe ze zich geregeld òngerein de kop in. Höbs dao grosso modo twee gezindes: de kònservatieve van sjörgskar en de sjoebkar en de nujerwètse diej allein mer aan sex dènke. Es het òm de subsidies geit, höbbe de auwerwètse mèt hun sjörgskar natuurlik eine baeteren entree biej de provincie. Zònger sjörgskar kriegs-te dao niks gedaon.

Mer het sjient dat er noe al dippetees zeen diej nao de progressieve beginne te loestere. Want ei sjoon Limburgs Eige, mèt gooj sjtiepe ònger de vot en ouch nog get op de plank, dat kan väöl toeriste trèkke. Rechsjtreekse concurrentie van de Hollenjers mèt hunne kees, hun sjtòm meules en hun tölpe. Es veer mèt dat Limburgs Eige oetpakke wèt Käsefraulein Antje in Duutsjlandj neet meer wo ze mòt kroepe. Limburg pak de Hollenjers dan alle klandizie van de Pruse aaf. Allein mote veer nog oetprakkezere waat veer boete het sezoen van de 'Spargel' aan de Pruse kònne verkoupe. Mer het Limburgs Eigewies vundj dao waal get op.